عن سينما تارانتينو

 " الفنان الجيد هو من يقلد، أما الفنان العظيم هو من يسرق " 

- بيكاسو

مقولة مثيرة للجدل قالها بيكاسو وفي الوهلة الأولى من قرايتها هيواجه القارئ معضلة وهي إزاي الفنان لو سرق هيكون عظيم؟ وليه أصلاً  الفنان مُضطر يكون مُخير ما بين إنه يسرق أو يقلد! 

ده بيوصلنا لمعضلة تانية وهي هل معنى كده إن مفيش فنان بيخلق شيء من العدم؟

هو في الحقيقة من المستحيل تخلق شيء مش موجود أو تخلق شيء من العدم، ممكن نستخدم مصطلح اكتشاف أكتر من إنه خلق لأن كل شيء موجود بطبيعته وما على الإنسان إلا اكتشافه، حتى في وجود فن زي الفن السريالي اللي فكرته في الأساس قايمة على الخلق.. مع التدقيق فيه هنلاقيه مرحلة عليا ومتقدمة في اكتشاف اللاوعي ودواخل الإنسان وأحلامه الغريبة فبالتالي هو نتاج اكتشاف مش خلق لإنه متوجدش من العدم..

طيب هو ليه صعب الإنسان يخلق شيء من العدم؟ 

الإنسان من يوم ما يتولد وعينه تفتح على العالم بيبدأ لاوعيه يتشكل، ذاكرة بتخزن كل شيء بيمر عليه وبالتالي أي شيء هيشوفه سواء كان مدرك له أو غير مُدرك هو هيتأثر بيه، حتى بيُقال إن الإنسان من قبل ما يتولد وهو في بطن أمه بيتأثر بالأصوات الخارجية اللي بتحصل وبيقال إنه لو سمع مزيكا هادية مثلاً بيطلع شخص طباعه هادية وودنه موسيقية، فبالتالي الإنسان لو هو نفسه شايف إنه بيخلق شيء من العدم ومتأثرش بشيء خلال صنع الشيء اللي عمله ده يبقى هو مخطئ تماماً سواء أدرك الخطأ ده أو لا ... لو قولنا إن فيه فنان بيخلق من العدم فالفنان ده اتولد واتحط في أوضه مطلعش منها طول حياته وبعدين طلع قدم شيء، وقتها نبقى نقول ده خلق شيء من العدم وطبعاً ده مبيحصلش...

تارانتينو  في مرة قال جملة شبيهة تماماً بمقولة بيكاسو

I steal from every movie ever made 

والحقيقة بتعجب لما ألاقي حد من كارهي الراجل ده بيهاجمه بالجملة دي مع إنها تثبت إن تارانتينو فنان عظيم ويُطبق عليه مقولة بيكاسو.. 

إزاي تارانتينو بيخضع للمقولة دي وهل تارانتينو فعلاً فنان عظيم؟ 

في رأيي إن اه تارانتينو فنان عظيم وبشوفه من أذكى صناع السينما اللي شافتهم عيني... 

في البداية إحنا قدام فنان متصالح مع نفسه ومُدرك تماماً للقاعدة الأولى اللي بتخضع لمقولة بيكاسو وهي إن الفنان العظيم بيسرق فطلع قال أنا حرامي، على عكس صناع كتير ممكن يقوموا بنكران النقطة دي.. 

طيب إيه الفرق بين التقليد والسرقة وليه برضه تارانتينو فنان عظيم؟

هقول مثال بسيط هيوضح في البداية يعني إيه مصطلح تقليد في الفن وخصوصاً في السينما.. 

فيلم A Fistful of Dollars  أول فيلم ضمن ثلاثية الدولارات لسيرجي ليوني.. اللي شافه يشوف فيلم 

Yojimbo 

لكورساوا وبعد مشاهدة فيلم كورساوا المُشاهد هيدرك تماماً معنى مصطلح تقليد وطبعاً ليوني هو اللي قلد كورساوا.. جدير بالذكر إن كورساوا مقتبس الفيلم من رواية أمريكية في الأساس فبالتالي لو الموضوع كان توقف لحد النقطة دي مكنش هيسمى بتقليد لكن اللي حصل إن ليوني خد مشاهد صريحة من فيلم Yojimbo  ومكانش مجرد مشهد أو اتنين لا دي مشاهد كتير وكلها مشاهد فارقة وبتحل عقدة الفيلم وبالتالي ده كان فقر فني عند ليوني في الفيلم ده لإنه قلد مسرقش أو طوع اقتباسه ده لخدمة أسلوبه حتى.. 

تارانتينو حرامي، بيسرق لكن مبيقلدش 

إيه الفرق بين السرقة والتقليد الأول؟ 

التقليد هو زي ما ذكرت فوق إن الفنان بيشوف حاجة فبيرسمها زي ما شافها مبيحطش اللمسة الإبداعية بتاعته وبيتخلى عن عنصر الإبتكار اللي بيتم تطويعه بعد الاقتباس فبالتالي المُتلقي هيقدر بسهوله يعرف أي النسختين أصلي وأيهما مُزيف ومُقلد، لكن السرقة هي إن الفنان يقوم بأخذ الشيء، امتلاكه بشكل كامل لدرجة إن المُتلقي ينسى في الأساس إنه مسروق وينسجم تماماً مع الشيء الجديد مُتناسي حقيقته نقدر نقول إنه غسيل أفكار، وده اللي بيعمله تارانتينو وله كيفية استثنائية في ده..

تارانتينو راجل بيحب السينما مش صنايعي

 الصنايعي أوقات كتير مُلتزم بنسق معين بيحجمه لكن اللي عنده شغف بالشيء هيقدر يبدع فيه أكتر لإنه بيحاول على قد ما يقدر يخرج بيه بره الحدود المرسومة، تارانتينو بيسرق وبعد ما بيسرق بيخلق عالم كامل خاص بيه هو وبعدين بيبدأ يحط كل حاجة سرقها جوه العالم ده وبيبدأ ينفذ ده بأسلوبه الخاص وده كله بيجعل المتلقي يتناسي الأصل ويعيش في عالم تارانتينو الخاص واللي بيتمثل في عالم فوضوي مليىء بالشخصيات العبثية والنهايات العدمية المفاجئة بجانب طريقة صياغته الاستثنائية للحوار ووصول جرعة المتعة في أفلامه لأشُدها.. تارانتينو راجل بيقدر السينما، تأثر بالموجة الفرنسية وبالأخص بجودار وده كان ظاهر في فيلمه خيال رخيص، تأثر بالويستيرن الأمريكي فعمل جانجو الحر، تأثر بموجة هونج كونج فعمل كلاب المستودع وتأثر بالموجة اليابانية وبالأخص أفلام الساموراي فعمل إقتُل بيل، فدلوقت إحنا قدام فنان بيحيي تراث السينما وبيعيد صياغته بشكل مُعاصر يرضي جميع الأذواق وبيقدم كل التيمات دي بإسلوبه الخاص ومش بس بيرثيها عبر مشهد ولا اتنين لا ده بيخلق عوالم كامله من صنعه هو وبيقدمها بشكل مُمتع وسهل ممتنع روش،  فبالتالي أنا مش متخيل إن فيه حد يحب السينما وميحبش تارانتينو، ده من نحية اللي بيقدمه للمشاهد، أما بعيداً عن المشاهد تارانتينو بيثبت إنه صانع أفلام عظيم وله بصمة خاصه وبيقدم للسينما نفسها مش للمشاهد وبس وده ظهر بشكل واضح في أفلام زي 

Pulp fiction

بإستخدامة لأسلوب سرد ما بعد حداثي عن طريق حكية للحدوته بشكل معكوس 

وفي فيلم

Inglourious Basterds 

 

لما بيتمرد على القيم العليا للإنسان وبيعمل بمقولة نيتشه " وأنت تطارد الوحش حذاري أن تتحول أنت أيضاً إلى وحش" وبيجعل من المُشاهد أداه بيستخدمها بيدعم بيها فكرته عن طريق تطويعه لعامل المتعة فبيتناسى المشاهد في الأساس إن عنصر استمتاعه بيتنافى مع القيم اللي مُتمسك بيها  كرفضه للعنف والتعذيب...  

 فبالتالي دور تارانتينو مينفعش حد يحجمه بإنه نسبي بيعجب ناس معينة وبس أو بيتوقف عند المشاهد..  لأنه أضاف لصناعة السينما بأسلوبه الخاص وخرج بنتاج يستحق الإشادة بيه فحتى لو الراجل ده في نظر بعض المشاهدين مخرج تجاري لأن أفلامه في المقام الأول بترتكز على عنصر المتعة ده ميتنافاش أبداً مع جودتها وقيمتها الفنية، ده بجانب إن أي حد بيشوف مشهد من أي فيلم لتارانتينو بيعرف ببساطة إن الفيلم ده بتاعه، وإيه يميز فنان عن فنان تاتي غير إن يكون له أسلوب يميزه؟.

تم النشر بتاريخ 10 أغسطس 2019