عن يوسف شاهين - حدوتة مصرية

 -هل قمت بالقتل منفرداً، ولوحدك ولا اشترك معاك حد؟

= لا مش لوحدي.. اشترك معايا ناس كتير أوي

- حدوتة مصرية (1982)

إخراج/ يوسف شاهين

المشهد عبارة عن محاكمة، محاكمة لفنان لمحاولته قتل نفسه، طيب مين بيتحاكم؟ اللي بيتحاكم هنا هو الطفل اللي جوه الفنان ده، الطفل اللي بيتعصب بسرعة وبيتهته في الكلام، الطفل الحالم والشغوف بالفن، الطفل اللي أوقات كتير بيكون أناني ومبيشوفش غير نفسه، كان كل حلمه يلعب وهو صغير لكن مقدرش، الطفل كان ضحية مقدرش يتحرر فقرر السكوت ودفن نفسه... 

الطفل مبيسكتش بل بيتحول فجأة لقاضي بيتكلم بنبرة تهكمية بيحاكم نفسه اللي دفنها الزمن وعانت من الكبت، بيحاكم الدين بيحاكم المجتمع وبيحاكم أهله وبيتمرد على القيود وبيقرر الخروج عن صمته.. 

الإنسان دايماً بيظلم نفسه بدفن الطفل اللي جواه بأحلامه وشغفه وحبه للبنت البريئة وبجنانه وكل ده بحجة إنه بيتفرغ لمواجهة مصاعب الحياة وبينسى إن الطفل هو حقيقته اللي لازم تتحرر ومع خروج الحقيقة دي بيلاقي الإنسان نفسه من تاني وكأنه اتولد من جديد .. 

الفنان في النهاية وصل للتصالح مع النفس عن طريق محاكمته لنفسه، راجع أفكاره ومر بجميع ذكريات حياته واكتشف ظلمه البين للطفل ده، اللي عاني من النبذ طول حياته وفي النهاية بيجد ضالته بإنه يتصالح معاه ويمد له إيده...  

وبيختم الفنان الفيلم بجملة"  أنا مبقتش وحيد "

تم النشر بتاريخ 8 يوليو عام 2019